Minisitiri w’Ubutegetsi bw’Igihugu, Musabyimana Jean Claude, arashimira abaturage bakomeje kwitabira igikorwa cy’amatora, asaba ko buri wese akora ibimureba akarangiza inshingano ze mboneragihugu zo kwitorera abayobozi, mu ituze no mu mutekano.
Ni mu butumwa yatanze ubwo yari amaze gutorera Perezida wa Repubulika n’Abadepite kuri Site ya Gashangiro mu Mudugudu wa Nyiraruhengeri, Akagari ka Rwebeya Umurenge wa Cyuve mu Karere ka Musanze.
Ubwo yageraga kuri site y’itora ya Gashangiro mu ma saa tatu, yishimiye ubwitabire bw’abaturage kuri iyo site, amaze gutora agira ubutumwa agenera Abanyarwanda.
Ati “Gutora ni ibintu bishimisha buri wese ukurikije uko bisigaye bitegurwa, umutuzo wabaye mu gutegura amatora, gushyiraho amategeko, kwiyamamaza, uburyo abaturage babyitabiriye n’uburyo bitabiriye uyu munsi, nk’umuntu ushinzwe imiyoborere y’Igihugu biradushimishije cyane uburyo biri kugenda neza”.
Arongera ati “Nanjye ubwanjye by’umwihariko ndishimye kuba nshoboye gutora, ni ikintu uba wifuza kugira uruhare mu miyoborere y’Igihugu cyawe, ni byiza birashimishije tukaba dushimira abaturage uko bakomeje kubyitabira”.
Yagize icyo asaba abaturage haba muri iki gihe cyo gutora, ndetse na nyuma y’amatora ati “Abaturage rwose ni ukubashimira mbere na mbere uburyo bitabiriye ubutumwa bubashishikariza kwitabira amatora, tunabashimira uko bitwaye uyu munsi, ndetse tukabashishikariza gukurikirana neza ibikorwa by’amatora buri wese agakora ibimureba”.
Arongera ati “Buri wese akarangiza inshingano ze mboneragihugu zo kwitorera abayobozi b’Igihugu mu ituze n’umutekano, kandi bakazitabira n’izindi gahunda zose zikurikiraho nyuma y’amatora, kuko nyuma y’amatora hari ibindi basabwa ko abayobozi bitoreye, iyo bamaze kujyaho bakomeza kubafasha kugira ngo Igihugu gikomeze gitere imbere”.
Bavuga ko nyuma yo gutora batashye, ariko bemeza ko biteguye kugaruka saa cyenda gukurikira igikorwa cy’ibarura ry’amajwi, mu rwego rwo kumenya neza uko uwo batoye ahagaze.
Umukecuru ati “Twazindutse twari twabukereye saa kumi n’ebyiri z’igitondo ngo twitorere umuyobozi uzatugeza aheza, itariki yo kumutora yari yadutindiye none irageze, ubu turatashye Imana ikomeze imurinde, saa cyenda turagaruka dukurikirane ibarura ry’amajwi, ni twumva uwo twashyize imbere byaciyemo turabyina umudiho”.
Umukazana we ati “Turamutsindiye, twamuhaye amajwi yacu Imana ihabwe icyubahiro, turaza kubarura amajwi, tubikurikirane gatanu kuri gatanu, ahasigaye turare mu birori”.
About The Author
Related posts:
UN Panel of Experts Again Accuses Uganda of Supporting M23
Mifotra yagize icyo yizeza abarimo urubyiruko
DRC: Bitewe no gusebya FARDC Koffi Olomide yatumijwe murukiko
Minisitiri Dr Mujawamariya Jeanne d’Arc yirukanywe ku mirimo ye
Students in Bangladesh swear to carry on protesting unless leaders are freed.
Amb. Olivier Nduhungirehe yanyomoje ubutumwa bwatanzwe na MONUSCO
Abakuru b’inzego zishinzwe iperereza bo mu Rwanda na DRC bahuriye i Luanda
RDC: Umusirikare wa FARDC yarashe Afande we mu cyico
