Ku gicamunsi cyo ku wa Mbere tariki 19 Kanama 2024 mu Murenge wa Nyamata mu Karere ka Bugesera mu Ntara y’Iburasirazuba hatangiye ibikorwa byo kubaka imihanda mu rwego rwo kurushaho kuzamura iterambere ry’abaturiye iyo mihanda ndetse n’abayikoresha. Imihanda ifite uburebure bw’ibilometero 2 na metero 100 izubakwa mu mezi Umunani itwaye asaga miliyari 2.232 FRW .
Umuhango wo gutangiza kumugaragaro ibikorwa byo kubaka imihanda witabiriwe n’ubuyobozi bw’Akarere ka Bugesera, abahagarariye Ikigo gishinzwe gutera Inkunga ibikorwa by’iterambere mu nzego z’ibanze (LODA), abahagarariye ikigo cy’ubwubatsi cya NPD-COTRACO n’abandi.
Hazubakwa imihanda 7 mito yose iri mu Mujyi wa Nyamata ari yo; uva imbere y’ikigo cy’urubyiruko cya Bugesera – Centre de Sante Nyamata – Café-Nyamata – Sitatiyo Rubis.
Undi uzubakwa ni uva iruhande rw’inyubako ikoreramo Banki ya Kigali ukagera ku muhanda wa kaburimbo ugana i Karambi/Kacyiru.
Hazubakwa umuhanda uva ku ivuriro rya St David ugakomereza kuri Sitade ya Bugesera, hari kandi unyura ku ishuri rya La Racine na Laqinta Motel, ukagera ku muhanda munini.
Frank Rukundo uhagarariye NPD isosiyete izubaka iyi mihanda, avuga ko intego ari ukubaka imihanda neza kandi mu gihe gito.
Ati: “NPD COTRACO, nk’ikigo Nyarwanda, dushimishwa no gukora ikintu kikarangira ku gihe kandi neza, kuko ni ishema kuri twe.
Mu gukora uyu muhanda harimo ibizatworohereza kuko inganda zikora kaburimbo ziri hano mu Bugesera. Ikindi iyo tugiye gukorera ahantu, mu gutanga akazi, abitabwaho ba mbere ni abahatuye, bivuze ko kubaka imihanda bitanga akazi ku rubyiruko rwinshi.”
Ntirenganya Jean Pierre ukora umwuga wo gutwara abantu n’ibintu ku igare yishimiye ko bagiye kubakirwa umuhanda uzaba igisubizo cy’ikibazo cy’ibinogo byagaragaraga mu mihanda idakoze.
Yagize ati: ”Iyo mihanda bavuze n’iyo yari ibangamye cyane kuko kuhanyura mu bihe by’imvura byabaga bigoye kubera ko hari iyari irimo ibinogo nk’uriya ujya mu mudugudu w’abakozi bavuze, mu mvura wahoraga wuzuyemo ibiziba ukaba utahanyura uhetse umuntu”.
Rutagengwa Francois, umwe mu bakorera mu Murenge wa Nyamata, avuga ko ari ibintu bishimishije cyane kuko ngo imihanda igiye kubakwa izazamura urwego rwa serivisi atanga.
Ati: “Mu by’ukuri icyo bigiye gukemura cyo ni kinini, kuko hari harimo ingorane zituma akazi katagenda neza, kuko mu mirimo mpakorera harimo aho biyakirira, aho bakorera ubukwe ku buryo usanga nko kubayobora kugira ngo bahaze nko mu gihe cy’imvura, twagiraga ikibazo cyo kubura abakiriya, ariko icyo kibazo ni cyo imihanda igiye gukemura, bitume n’agafaranga kaboneka […]”.
Mutabazi Richard, Meya w’Akarere ka Bugesera, yasabye uruhare rwa buri wese kugira ngo imirimo yo kubaka imihanda izihute kandi ku gihe.
Yavuze ko mu gihe hazamo amananiza aturutse ku Bigo nka WASAC ntibikuremo amatiyo vuba, REG ntikuremo amapoto y’umuriro byihuse ko byagorana kugira ngo imirimo yo kubaka irangirire igihe.
Akomeza avuga ati: “Uko amafaranga yabonetse babivuze, bashakaga amafaranga ahita akoreshwa mu buryo bwihuse. Ni nk’igerageza navuga turimo kugira ngo barebe bati, ese Bugesera ifite ubushobozi bwo gukoresha aya mafaranga mu buryo bwihuse, tuzazane n’andi menshi? Ibyo rero tuzabitsinda ari uko twese dufatanyije. Nituwubaka neza kandi vuba, ubwo n’andi mafaranga azaza kuko bizaba bigaragaye”.
Akarere ka Bugesera ni kamwe mu Turere twari twarahejejwe inyuma aho kari karagizwe ahacirirwa abantu kubera ibibazo by’amateka.
Kuri ubu ni Akarere gakomeje guturwa ndetse no gushyirwamo ibikorwa remezo bifasha abagatuye.
About The Author
Related posts:
Mangesh Verma yagizwe Umuyobozi mushya wa CIMERWA
Leta yiyemeje kwigurira toni 31 000 z’umuceri wabuze isoko
Uganda yatangiye gushakisha peteroli mu tundi turere 2 ikekwamo
Gatsibo: Kabarore barishimira imihanda ya kaburimbo ya 3.5 km izatwara 1 394 000 000 Frw
KENYA: Guverinoma yakumiriye isukari ituruka muri EAC
Dr Karangwa yagaragaje ingano y’umusaruro wangirikira mu murima
MINICOM iri gushaka igisubizo ku ibura ry’ibyo gupfunyikamo
Ecobank Rwanda yinjiye mu bufatanye na RTN butuma igera mu gihugu hose
