Umuyobozi Mukuru w’Urwego rw’Igihugu rw’Imiyoborere, RGB, Dr Doris Uwicyeza Picard yagaragaje ko nubwo abenshi mu banyamakuru bakora kinyamwuga ndetse bakubahiriza amategeko y’umwuga ariko hari abandi cyane cyane bakorera kuri internet bakibyirengagiza nkana ndetse bakwiriye kwitabwaho by’umwuihariko, iyo mikorere igahagarara.
Ni ubutumwa Dr Uwicyeza yanyujije kuri X asubiza ku bundi bwagaragaragamo amashusho y’umwana wabazwaga ibibazo bitandukanye bijyanye n’imyidagaduro.
Uwo mwana w’umukobwa bigaragara ko ari muto yari mu mashusho yafatiwe ku muyoboro wa YouTube wa Isimbi TV aganira n’Umunyamakuru Munyengabe Murungi Sabin uwukoraho.
Ni ku ngingo yagarukaga ku rukundo rwa bamwe mu bo mu myidagaruro barimo Nyambo na Titi Brown bakunze kugaragara nk’abakundana ariko bo ubwabo bakavuga ko ari inshuti zisanzwe ibizwi nka ‘bestie’
Munyengabe yabajije uwo mwana icyo abitekerezaho bigera n’aho amubaza niba na we yakwemera inshuti y’umuhungu (bestie) nka bimwe bya Titi Brown na Nyambo, umwana asubiza ko bidashoboka.
Icyo kiganiro cyazamuye amarangamutima ya bamwe mu bakoresha imbuga nkoranyambaga cyane X, bagaragaza ko ibyakozwe ari ibyaha ndetse ko n’Urwego rw’Ubugenzacyaha, RIB rwagakwiriye kubikurikirana.
Uwitwa Incakura ati “Ese ko wagira ngo RIB na yo ikorera ku jisho, ubu ni gute itabona ko ubutumwa nk’ubu bukoreshwa abana bataruzuza imyaka y’ubukure budakwiriye. YouTube ikomeje kwambura ubwana abana bakiri bato!!”
Dr Uwicyeza yahise asubiza ubutumwa bwa Incakura, agaragaza ko bibangamye ndetse yibaza niba ababyeyi b’umwana wagaragaraga mu mashusho batanze uruhushya ngo ayo mashusho ashyirwe hanze.
Ati “Uyu “munyamakuru” se kuki ari kubaza ibi bintu umwana? Uku gukoresha abana hagamijwe ko ibyo bashyira ku mbuga zabo bikundwa ndetse bikanarebwa bigomba guhagarikwa.”
Ubwo butubwa bwa Dr Uwicyeza bwavuzweho kandi n’uwitwa Denyse Twagira washimiraga uyu muyobozi, akagaragaza ko icyo kibazo gifitwe n’abandi benshi bafite imiyoboro ya YouTube “babaza abana ibibazo bidafututse, umuntu akibaza uburyo iyo myitwarire idakurikiranwa.”
Ati “Nishimiye ko mubizi. Ni ikibazo kigomba gukurikiranwa mu maguru mashya kuko kurengera umwana no gushyiraho imirongo ntarengwa ari ingenzi mu kurengera abana bacu.”
Aha ni na ho Dr Uwicyeza yavuze ko muri rusange abanyamakuru benshi bakora kinyamwuga mu kubahiriza amategeko awugenga nko kurengera abana, ariko avuga ko ikibazo gisigariye “ku bakorera kuri internet bakeneye kwitabwaho by’umwihariko.”
IGIHE yamenye ko RGB iri gutegura gahunda yihariye yo kwita ku Itangazamakuru mu guhangana n’ibibazo biririmo by’umwihariko ibyo kudakora kinyamwuga, ndetse mu minsi ya vuba izatangazwa.
Amashusho ari kuri Youtube y’icyo kiganiro, bigaragara ko uwo mwana yari kumwe n’umubyeyi we, baganira ku buzima n’ibihe bigoye uyu mubyeyi yanyuzemo ngo yibaruke.
Iteka rya Minisitiri w’Ikoranabuhanga na Inovasiyo ryo ku wa 22 Mutarama 2024 ryerekeye inama mpuzabikorwa y’indangamuntu koranabuhanga, rigaruka ku nshingano zikomeye z’abakoresha imbuga nkoranyamaga mu kurinda umwana.
Rigaragaza ko abo bagomba kugira uruhare mu kubungabunga no kurinda umutekano w’abana ku ikoranabuhanga binyuze mu kwigenzura.
Rivuga ko by’umwihariko bagomba kwirinda guhanga no gutangaza amashusho agaragaza abana bakina filime bafitemo inshingano zitajyanye n’imyaka yabo, nk’iz’urukozasoni cyangwa ziganisha ku bikorwa by’ubusambanyi, urwango, ibiteye ubwoba, ihohotera, ibiyobyabwenge, imvugo ishotorana cyangwa yubahuka, n’ibindi.
Bagomba kandi kwirinda guhanga no gutangaza amafoto cyangwa amashusho y’abana hagamijwe imyidagaduro cyangwa ubucuruzi nta burenganzira yabiherewe n’ufite ububasha bwa kibyeyi kuri uwo mwana hakurikijwe amategeko abigenga.
About The Author
Related posts:
Rutsiro: Umucanga watezaga umwiryane mu Bayobozi ubu wahinduye ubuzima bwa benshi
Pi Networks Could Displace Banking Payment Systems in the Future – Gate of Wise News
Kayonza: Abaturage barasaba kubakirwa sitade igezweho
Ubwenge bukorano (AI): Ni iki? Bukora gute? Bufasha iki? Ni izihe mpungenge buteje?
Ebenezer Rwanda Church yahagaritswe mu Rwanda
Meteo Rwanda yatangaje ko ukwezi kwa Kanama 2024 kuzakomeza kurangwa n’izuba
Ngoma: Urubyiruko rwavuye k’umuhanda rurishimira ubuzima rubayemo
Abapolisi 50 basoje amahugurwa yo kurinda abanyacyubahiro
Thank you for your sharing. I am worried that I lack creative ideas. It is your article that makes me full of hope. Thank you. But, I have a question, can you help me?