Perezida wa FIFA Gianni Infantino, uwa CAF Patrice Motsepe, bitabiriye umuhango wo gushyingura mu cyubahiro Issa Hayatou wabaye Perezida wa CAF hagati ya 1988 na 2017, akaba na Visi Perezida wa FIFA, uherutse kwitaba Imana ku myaka 77 azize uburwayi.
Uyu muhugo wo guherekeza bwa nyuma Issa Hayatou wabaye kuri uyu wa Gatanu tariki 16 kanama 2024 mu Mujyi Garoua muri Cameroun, ari na ho yavukiye, witabirwa n’abanyabigwi nka Samuel Eto’o, Roger Milla, Véron Mosengo-Omba, Ahmad Ahmad n’abandi bayobozi b’amashyirahamwe ya Ruhago muri Afurika.
Tariki 8 Kanama 2024 ni bwo Issa Hayatou yitabye imana azize uburwayi i Paris mu Bufaransa aho yari amaze iminsi arwariye.
Imiyoborere ye yaranzwe n’izamuka rya ruhago Nyafurika ariko ikemangwa mu ikoreshwa ry’amafaranga aho hari n’ayakoreshejwe mu kugira ngo akomeze kuyobora.
Hayatou yahagaritswe mu bikorwa byose by’umupira w’amaguru na FIFA igihe cy’umwaka umwe mu 2021 kubera uburiganya yagize mu itangwa ry’isoko ryo kwerekana amashusho y’amarushanwa Nyafurika hagati ya 2014 na 2017.
Akanama nkempurampaka ka FIFA kemeje ko Hayatou yasinye amasezerano mu izina ry’Impuzamashyirahamwe ‘CAF’, nyamara bikayishyira mu gihombo.
Uyu mugabo yashinjwe ko yarenze ku mategeko agena uburenganzira bungana mu guhatana ku isoko, ubwo yatangaga isoko rya miliyari y’amadolari y’Amerika rijyanye no kwerekana no kumenyekanisha ibikorwa bya ruhago yo kuri uyu Mugabane, ryahawe ikigo Lagardère Sports cyo mu Bufaransa.
Issa Hayatou yabaye Perezida w’inzibacyuho wa FIFA hagati ya 2015 na 2016, ubwo Sepp Blatter wari Umuyobozi yahagaritswe akurikiranyweho ibyaha bya ruswa.
Nyuma yo gusimburwa n’Umunya-Madagascar Ahmad Ahmad mu 2017, Hayatou yabaye Perezida w’Inama y’Ubuyobozi ya ANAFOOT muri Cameroun ndetse aba muri Komite yateguye Igikombe cya Afurika cya 2021. Yari kandi Perezida w’Icyubahiro wa CAF.
Ku ngomba ye ari Umuyobozi wa CAF Hayatou yashyizeho irushanwa rya CHAN rikinywa n’amakipe y’ibihugu agakoresha abakinnyi bakına imbere mu gihugu.
Hayatou yabaye kandi Perezida w’Ishyirahamwe ry’umupira w’amaguru muri Cameroon (FECAFOOT) kuva mu 1986 kugeza mu 1988.
About The Author
Related posts:
APR FC yerekeje muri Tanzania aho yitabiriye imikino ya CECAFA
Mu myaka irindwi ishize u Rwanda rwakiriye imiko yo k’urwego mpuzamahanga ikurikira:
ABAKINNYI 10 BAKOMEYE KURUSHA ABANDI MU ISIGANWA RY’IGARE
FERWAFA yatangaje ko Umukino wa Mukura na Rayon Sports utahindura amasaha ya Super Coupe
TENNIS: Rafael Nadal ntazitabira US Open
OLYMPICS: A holiday was announced in honor of the 21-year-old athlete from Botswana, Letsile Tebogo.
Abanyarwanda bongeye kugorwa, Gibson agera muri ¼ cya ‘J60Kigali’
Basketball: U Rwanda rwasezerewe mu gushaka itike y’igikombe cy’Isi
