Iyubakwa ry’ibikorwaremezo ku bwinshi ndetse no kwakira amarushanwa yo ku rwego mpuzamahanga ni kimwe mu byaranze imikino mu Rwanda mu myaka irindwi ishize.
Muri iyi nkuru tugiye kugaruka kuri amwe mu marushanwa mpuzamahanga u Rwanda rwakiriye mu mikino itandukanye.
Umupira w’Amaguru
Mu myaka irindwi ishize, umupira w’amaguru ntabwo wakunze kwakira amarushanwa menshi ugereranyije n’indi mikino. Icyakora nk’umukino wa mbere ukunzwe ku isi no mu Rwanda by’umwihariko ntabwo wiburiye kuko wabashije kwakira amarushanwa yo mu byiciro by’abakuru ndetse n’abato.
Mu 2019, u Rwanda rwakiriye CECAFA Kagame yaje kwegukanwa na KCCA FC yo muri Uganda itsinze Azam FC yo muri Tanzania ku mukino wa nyuma igitego 1-0.
Ikipe ya Green Eagles yo muri Zambia yegukanye umwanya wa gatatu itsinze AS Maniema Union de Kindu yo muri Repubulika Iharanira Demokarasi ya Congo ibitego 2-0.
Mu 2020, mu Karere ka Rubavu habereye Irushanwa rya CECAFA mu Baterengeje imyaka 17. Ikipe y’Igihugu ya Uganda yaje kuryegukana itsinze iya Tanzania 3-1, mu irushanwa Travis Mutyala yigaragarijemo bikomeye.
Tennis
Imwe mu mikino yazamuye urwego cyane muri iyi myaka irindwi ishize uvuze ko Tennis irimo ntabwo waba uri kure y’ukuri kuko uyu mukino watangiye kwakira amarushanwa mpuzamahanga ku rwego rwa Afurika n’Isi muri rusange.
Mu 2022, u Rwanda rwakiriye irushanwa ya ITF Juniors Grade 4 &5. Ni irushanwa ryitabiriwe n’ingimbi n’abana bari munsi y’imyaka 18 baturutse mu bihugu 33. Iri rushanwa kandi u Rwanda rwongeye kuryakira mu 2023.
Davis Cup ni irindi rushanwa rikomeye u Rwanda rwakiriye mu 2022 na 2023 nko muri uyu mwaka ryitabiriwe na Angola, Botswana, Cameroun, Ghana, Kenya, Mozambique na Nigeria.
Ryagenze neza ku rw’imisozi igihumbi kuko ryageze ku mukino wanyuma ubwo rwatsindaga Angola.
Rwanda Open ni irindi rushanwa rimaze gushinga imizi mu Rwanda ndetse ryazamuriwe n’urwego riba M25. Iriheruka mu 2023 ryegukanywe na Umufaransa Corentin Denolly watwaye icyumweru cya kabiri atsinze Umunyamerika Oliver Crawford wari watsinze iry’icyumweru cya mbere.
Mu 2023 na 2024, u Rwanda rwakiriye Billie Jean King Cup rimwe mu marushanwa akomeye cyane, aho ku nshuro ya mbere (mu 2023) ryitabiriwe n’ibihugu 11, ryarangiye Madagascar iryegukanye nyuma yo gutsinda Tanzania. Icyo gihe Ikipe y’Igihugu y’u Rwanda y’Abagore yegukanye umwanya wa kane.
Mu 2024 iri rushanwa nabwo ryarabaye ryegukanwa na Algérie yahize andi nyuma yo gutsinda Togo biyoroheye imikino 3-0 . Ni mu gihe Ikipe y’Igihugu y’u Rwanda yasoje ku mwanya wa gatanu.
Amata yabyaye amavuta ku bakunzi ba Tennis ubwo u Rwanda rwakiraga irushanwa rikomeye cyane ku rwego rw’isi, ATP Challenger 50 muri Werurwe 2024.
Ni irushanwa ryitabiriwe na Perezida Paul Kagame na Madamu Jeannette Kagame bashyikirije igikombe Umunya-Pologne Kamil Majchrzak waryegukanye atsinze Umunya-Argentine, Marco Trungelliti, amaseti 2-0 (6-4, 6-4).
Si abo gusa kuko ryanitabiriwe n’umunyabigwi muri uyu mukino, Yannick Noah, Perezida wa CAT, Jean Claude Talon n’Umuyobozi Mukuru wa ATP Challenger Tour, Eric Lamquet.
Basketball
Basketball ni undi mukino wongeye kuzamura izina n’igikundiro cyane mu Rwanda muri iyi myaka irindwi ishize.
Iki gikundiro yagikomoye ku kwakira ibikorwa byinshi kandi mpuzamahanga haba mu marushanwa ndetse na festival zitandukanye zikomeje kubera i Kigali.
Icyakora kuri iyi nshuro reka tugaruke ku marushanwa. Kenshi u Rwanda rwakunze kwakira imikino yo gushaka Itike y’Igikombe cya Afurika haba mu bagabo n’abagore.
Iyubakwa rya BK Arena ryashyize uyu mukino ku rundi rwego by’umwihariko mu bijyanye no kwakira imikino itandukanye.
Mu 2020 ubwo isi yose yari yatitijwe na Covid-19, u Rwanda rwishatsemo ibisubizo bityo rubonwa nk’ahantu heza ho kubera amarushanwa kandi hatekanye.
Kuva muri uwo mwaka kugeza mu 2024, imikino ya nyuma ya Basketball Africa League yabereye i Kigali. Si ibyo gusa kuko muri Kanama mu 2023 u Rwanda rwakiriye Igikombe cya Afurika mu Bagore cyegukanywe na Nigeria.
Cricket
Tariki 28 Ukwakira 2017 wari umunsi w’amateka ku Mukino wa Cricket mu Rwanda kuko nibwo umuryango mugari w’uyu mukino watashye Stade Mpuzamahanga y’uy’umukino iherereye Gahanga mu Karere ka Kicukiro.
Iyi stade yahesheje u Rwanda gutangira kwakira imikino mpuzamahanga haba iyo mu karere ndetse no ku rwego rw’isi.
Gukarishya ingamba zo kurwanya Covid-19, byunguye uyu mukino cyane kuko mu 2021 u Rwanda rwakiriye amarushanwa ane muri atanu mpuzamahanga yabereye muri Afurika.
Aya marushanwa yari yiganjemo ayo gushaka itike y’Igikombe cy’Isi nka “ ICC U-19 Men’s Cricket World Cup Africa Qualifier” na “ICC Men’s T20 World Cup Sub Regional Africa Qualifier Group A&B”.
Muri uyu mwaka kandi aya amarushanwa yinjirije igihugu asaga miliyoni 90 Frw.
IRONMAN
Mu 2022, u Rwanda rwakiriye ku nshuro ya mbere amarushanwa azwi nka IRONMAN 70.3 akinwamo umukino wa Triathlon ubumbatiye gusiganwa ku magare, ku maguru no koga.
Mu 2023, iri rushanwa ryongeye kubera i Rubavu riniharirwa n’Abanyarwanda kuko icyo gihe Ishimwe Héritier yaryegukanye, mu gihe Team Bigirimana yari igizwe na Bigirimana Jean De Dieu, Mugisha Moïse na Mutabazi Emmanuel yahize abandi mu bakina nk’ikipe.
Ni imikino kandi yitabirwa n’abarenga 1000 kuko iriheruka ryakinwe n’abavuye muri Kenya, Australia, u Bubiligi, Canada, Chile, Repubulika Iharanira Demokarasi ya Congo, Czech Republic, u Budage, Misiri, Espagne n’ibindi.
Shampiyona Nyafurika ya Karate
Mu 2018, u Rwanda rwakiriye Shampiyona Nyafurika mu mukino wa Karate ibera mu Intare Conference Arena i Rusororo, yitabirwa n’ibihugu 23.
Iri rushanwa ryanagenze neza ku Rwanda kuko rwasoje ari urwa karindwi n’imidali umunani irimo uwa zahabu umwe watwawe na Ndutiye Shyaka Maic mu cyiciro cy’abatarengeje ibiro 55 muri Kumite, Feza ebyiri n’imiringa itanu.
Ni mu gihe nk’ibisanzwe, Misiri yabaye iya mbere nyuma yo kwegukana imidali 26 harimo 16 ya zahabu.
Volleyball
Umwaka wa 2021 wasigaye mu mitwe y’abakunzi ba volleyball batabitewe n’ibyishimo ahubwo kubera agahinda ko gukurwa mu irushanwa ryakiriye.
Muri uyu mwaka, u Rwanda rwakiriye Shampiyona Nyafurika mu Bagabo n’Abagore.
Ryabaye irushanwa ribi ku Ikipe y’Igihugu y’Abagore kuko yakuwe mu irushanwa ubwo yari igeze muri ½ kubera gukinisha abakinnyi bakomoka muri Brésil batujuje ibisabwa.
Abo bakinnyi bari Aline Siqueira, Apolinario Caroline Taiana, Mariana Da Silva na Moreira Bianca Gomes.
Nyuma y’imyaka ibiri, u Rwanda rwakiriye irindi Rushanwa Nyafurika rya ‘Zone V Club Championship 2023’ ryanagendekeye neza amakipe yo mu Rwanda kuko Police VC yaryegukanye mu bagabo, mu gihe Rwanda Revenue Authority yatsindiwe ku mukino wa nyuma mu bagore.
Tour du Rwanda
Irushanwa mpuzamahanga ngaruka mwaka ryo gusiganwa ku magare ‘Tour du Rwanda’ ni rimwe muyo u Rwanda rwakira ndetse muri iyi myaka irindwi ishize ryazamuriwe urwego.
Mu 2019, Tour du Rwanda yavuye kuri 2.2 ishyirwa kuri 2.1 biyihesha kwitabirwa n’amakipe n’abakinnyi bakomeye ku isi.
Mu myaka itanu mbere, iri siganwa ryihariwe n’abanyarwanda, aho Ndayisenga Valens yaryegukanye inshuro ebyiri, Usengimana Bosco, Areruya Joseph na Mugisha Samuel baritwara inshuro imwe.
Kuzamurirwa urwego byatumye ibihembo bibura ku banyarwanda, ariko byongereye ubwitabire bw’amakipe akomeye n’abakinnyi bayobowe na Chris Froome wegukanye Tour de France inshuro enye.
Nyuma y’imyaka irindwi yaranzwe no kwakira amarushanwa neza ariko umusaruro ntushyike, kuri ubu u Rwanda rushyize imbaraga mu kugerageza kubona umusaruro mwiza ujyanye nuko rwakira.
About The Author
Related posts:
KISSTORY: After Ollie Watkins’ late game-winning goal, the England players celebrate reaching the Euro 2024 final with Wags and kissing their lady.
Rayon Sports yashyize hanze imyambaro izakoresha mu mwaka w’imikino utaha
Muhazi United yatangaje abakinnyi 6 bashya barimo 2 bo muri Repubulika iharanira demokarasi ya Congo
FOOTBALL: Chelsea’s boss Enzo Maresca still has work to do.
FOOTBALL: Manchester United irashaka kugumana Old Trafford mugihe yaba yubatse stade nshya.
OLYMPICS: The Canadian Women Team is rumored to have used drones to get ahead in the games!
Man City yegukanye igikombe cya “Community Shield” itsinze Man United
Abanyarwanda bongeye kugorwa, Gibson agera muri ¼ cya ‘J60Kigali’
