Imibare y’Ikigo cy’Igihugu cy’Ibarurishamibare igaragaza ko nubwo umubano w’u Rwanda na Repubulika Iharanira Demokarasi ya Congo ukomeje kugana hafi, ntacyo byahungabanyije ku bucuruzi bukorwa hagati y’ibihugu byombi.
Raporo yashyizwe hanze n’iki kigo igaragaza ko muri Kamena mu 2024 u Rwanda rwohereje muri Repubulika Iharanira Demokarasi ya Congo ibicuruzwa bifite agaciro ka miliyoni 16.20$, bingana na 9.55% by’ibicuruzwa byose u Rwanda rwohereje mu mahanga.
Ni imibare yazamutse ugereranyije n’umwaka ushize, kuko muri Kamena 2023, u Rwanda rwari rwohereje muri Congo ibicuruzwa bya miliyoni 12.91$.
Mu kwezi kwa Gicurasi mu 2024 bwo rwari rwohereje muri iki gihugu ibicuruzwa bya miliyoni 16.38$, bihwanye n’ijanisha rya 7.61% by’ibicuruzwa byose u Rwanda rwohereje mu mahanga muri icyo gihe.
Ibi bishyira Repubulika Iharanira Demokarasi ya Congo ku mwanya wa kabiri mu bihugu u Rwanda rwoherezamo ibicuruzwa byinshi, nyuma ya Leta Zunze Ubumwe z’Abarabu.
Uretse ibi bicuruzwa biba bifite inkomoko mu Rwanda, Repubulika Iharanira Demokarasi ya Congo iza no ku isonga mu bihugu u Rwanda rwoherezamo ibicuruzwa ariko narwo rwabanje kubikura ahandi, ibizwi nka ‘Re-exports’.
Imibare igaragaza ko muri Kamena mu 2024 u Rwanda rwohereje muri Congo ibicuruzwa byo muri ubu buryo bifite agaciro k’arenga miliyoni 52.69$, bangana na 94.03% by’ibicuruzwa byose u Rwanda rwakuye hanze, rukabigurisha mu bind ibihugu. Muri Gicurasi mu 2024 bwo u Rwanda rwari rwohereje muri Congo ibicuruzwa nk’ibi bifite agaciro ka miliyoni 55.85$.
Ubu bwoko bw’ubucuruzi nabwo bwarushijeho kuzamuka muri uyu mwaka kuko muri Kamena mu 2o23, u Rwanda rwari rwacuruje muri Congo ibifite agaciro ka miliyoni 49.67$.
Muri rusange Republika Iharanira Demokarasi ya Congo iza ku mwanya wa mbere mu bihugu u Rwanda rwoherezamo ibicuruzwa ariko narwo rwabikuye ahandi. Ikurikirwa na Ethiopia ndetse na Leta Zunze Ubumwe z’Abarabu.
Iyi mibare mu bijyanye n’ubucuruzi ikomeje kuzamuka mu gihe ariko umubano hagati y’u Rwanda na Repubulika Iharanira Demokarasi ya Congo utifashe neza.
Iki Gihugu gishinja u Rwanda gufasha umutwe wa M23 urwanya Leta y’iki Gihugu ushinja guhonyora uburenganzira bw’Abanye-Congo bavuga Ikinyarwanda biganje mu burasirazuba bw’iki Gihugu.
U Rwanda rwo rushinja Repubulika Iharanira Demokarasi ya Congo gushyigikira Umutwe wa FDLR wiganjemo abagize uruhare muri Jenoside yakorewe Abatutsi, ndetse kuri ubu ukaba ukomeje imigambi yo guhungabanya u Rwanda, ibintu unashyigikirwamo na Leta ya Congo nk’uko byagiye bishimangirwa kenshi n’Umuryango w’Ababimbye.
About The Author
Related posts:
The Annual Staff-led Community Service Programme of MTN Rwanda Y’ello Care Reopens to Improve Rural and Remote Communities’ Access to Education
RSwitch and Equity Bank Rwanda Introduce the eKash Platform
Following IT failures, airport traffic is expected to increase.
RWANDA EXPO 2024: Yitabiriwe n’ibigo bisaga 700
Utajiri wa mafuta waifanya nchi hii kujihisi kuwa na hatia
Kigali: Abasaga 5000 bari kuganira ku iterambere ry’ibiribwa rishingiye ku ikoranabuhanga
Uko ibiciro bya lisansi na mazutu byo mu Rwanda bihagaze ugereranyije no mu Karere
RUBAVU: Batatu bafatiwe mu bucuruzi bwa magendu y’imyenda n’inkweto bya caguwa
