Kantarama Marceline w’imyaka 65 wibanaga mu Mudugudu wa Bahemba, Akagari ka Kangazi, Umurenge wa Nkanka, Akarere ka Rusizi yasanzwe mu nzu yapfuye, afite igikomere mu mutwe igice cy’inyuma, musaza we atabwa muri yombi mu rwego rw’iperereza.
Umunyamabanga Nshingwabikorwa w’Akagari ka Kangazi, Nyirandorimana Laurence, yabwiye Imvaho Nshya ko inkuru yamenyekanye mu gitondo cyo ku wa Kabiri tariki 3 Nzeri 2024 ubwo murumuna we yirurwaga amushaka bukarinda bwira ataramubona.
Ati: “Yagezeyo mu gitondo agiye kumureba kuko asanzwe arwara Diyabete n’umuvuduko w’amaraso, agira ngo byaba byamuteye kutabyuka no gufunga telefoni, agezeyo, asanga inzu yose irarangaye.”
Yakomeje ati: “Yinjiye asanga aryamye mu cyumba kijya mu cyo yararagamo, agaramye, icyumba cyabaye amaraso gusa, yambaye ubusa wese. Yahise atabaza nanjye arampamagara tuje tubona icyuma iruhande rwa nyakwigendera, turebye neza dusanga yatewe icyuma mu mutwe igice cy’inyuma, barangije bamuryamisha agaramye, ntibanagira akantu bamworosa.”
Avuga ko bahise batabaza Urwego rw’Igihugu rw’Ubugenzacyaha (RIB) Sitasiyo ya Rusizi, bahageze bahamagaza ab’i Karongi ari na yo yakomeje iperereza ku rupfu rw’uyu mukecuru.
Anavuga ko telefoni ye bayibuze, bivuze ko abamwishe bayitwaye, n’imfunguzo z’inzu zirabura.
Musaza wa nyakwigendera yaketswe anahita atabwa muri yombi, impamvu ikaba ko bari bafitanye amakimbirane ashingiye ku mitungo.
Ayo makimbirane ashingiye ku kuba uwo musaza we yarasigaye nk’umukuru w’umuryango ababyeyi babo bamaze gupfa, imitungo yabo arayigabiza yima bashiki be arenzaho nk kuyiraga abahungu be.
Ikibazo ngo cyabaye agatereranzamba mu nkiko kuko kimaze imyaka 21 kiburanishwa cyaburiwe umuti.
Bikekwa ko yaba yahisemo kwivugana uyu mukecuru ngo acecekeshe na mushiki we muto bafatanyaga kumugeza mu nkiko.
Bose batuye mu Kagari kamwe, Imidugudu itandukanye.
Gitifu Nyirandorimana Laurence yasabye buri wese kuba ijisho rya mugenzi we, bakirinda amakimbirane n’icyateza umutekano muke cyose kirimo n’icyatera urupfu, “kuko nta wamena amaraso y’undi ngo yumve ko bizarangira bityo.”
Uyu muyobozi avuga ko nyakwigendera atigeze ashaka umugabo, icyakora yabyaye umwana apfa mbere ya Jenoside yakorewe Abatutsi.
About The Author
Related posts:
To avoid accidents, drivers are encouraged to abide by traffic laws.
Igitero cyo kwihorera cya Israel muri Yemen kibasiye Umujyi wa Hodeidah
KIGALI: Abahinzi banzuye ko bagiye kureka igikorwa cyo kuvanga imyaka
Rulindo: Abantu umunani bagwiriwe n’ikirombe
Paul Kagame yagenewe impano na Azam FC
Kigali: Abasaga 5000 bari kuganira ku iterambere ry’ibiribwa rishingiye ku ikoranabuhanga
Gicumbi: Abaturage Umukamo wose bawujyana ku isoko bakibagirwa abo bibarutse
Karongi: Habonetse imibiri y’abishwe muri Jenoside yakorewe Abatutsi
