Uko Abanyarwanda bakina hanze bitwaye mu mpera z’icyumweru

Bamwe mu bakinnyi b’Abanyarwanda bakina hanze bakomeje gufasha amakipe yabo gukomeza kugira itangiriro nziza z’umwaka w’imikino wa 2024/25 babona itsinzi.

Mu mpera z’icyumweru gishize mu bihugu bitandukanye’ imikino ya shampiyona yarakinwe nubwo hari abo shampiyona zabo zitahiriye.

Mu gihugu cya Ukraine shampiyona yakomezaga hakinwa umunsi wa Gatanu, Ikipe ya FC Kryvbas Kryvyi Rih ikinamo Kapiteni w’Amavubi Bizimana Djihad, yatsinze FC Livyi Bereh Kyiv ibitego 1-0 yuzuza amanota 10 mu mikino itanu imaze gukina muri Shampiyona.

Muri uyu mukino Djihad yakinnye iminota yose y’umukino.

Al Ahli Tripoli yo muri Libya ikinamo Manzi Thierry yanganyije na Simba SC yo muri Tanzania ubusa ku busa mu mukino ubanza w’ijonjora rya kabiri rya CAF Confederation Cup mu gushaka itike yo gukina amatsinda y’iri rushanwa Nyafurika.

Muri uyu mukino Manzi Thierry yakinnye iminota yose y’umukino.

Umukino wo kwishyura uteganyijwe ku Cyumweru tariki 22 Nzeri 2024 i Dar Es Salaam mu gihugu cya Tanzania.

Mutsinzi Ange ukinira FK Zira yo mu cyiciro cya mbere muri Azerbaijan yatsinze Neftci Baku ibitego 2-0 mu mukino w’Umunsi wa Gatanu wa shampiyona.

Mu mpera z’iki cyumweru kandi myugariro w’Ikipe y’Igihugu Imanishimwe Emmanuel ‘Mangwende’, yari yabanje mu kibuga mu mukino ikipe ye ya AEL Limassol yo muri Cyprus yagomba gukina Apollon Limassol gusa waje gusubikwa ku munota wa nyuma.

Rwatubyaye Abdul uherutse gusinyira Brera Strumica yo muri Macedonia y’Amajyaruguru yinjiye mu kibuga asimbuye ku munota wa 45 w’igice cya kabiri mu mukino ya ikipe ye ya Brera Strumica yatsinzemo Besea 1976 ibitego 3-2 ku munsi wa Gatanu wa shampiyona.

Mu gihugu cya Kenya AFC Leopards ikinamo Rutahizamu Gitego Arthur yatsinzwe na Posta Rangers igitego 1-0 mu mukino w’Umunsi wa kabiri wa Shampiyona.

Muri uyu mukino Gitego Arthur yinjiye mu kibuga asimbuye ku munota wa 75.

One Knoxville ikinamo rutahizamu Nshuti Innocent yatsinze Lexington SC igitego 1-0 mu mukino uyu Rutahizamu w’Umunyarwanda atakoreshejwe kuko atari no mu bakinnyi bari ku ntebe y’abasimbura.

Rutahizamu Jojoe Kwizera ukinira Rhode island yinjiye mu kibuga asimbuye ku munota wa 59 mu mukino ikipe ye yatsinzwemo na orange County SC igitego 1-0.

Sandvikens IF ikinamo Byiringiro Lague yanganyije na Skovde Aik ibitego 2-2 mu mukino uyu Munyarwanda yinjiye mu kibuga asimbuye ku munota wa 76.

York Rafael wa Gefle IF yo muri Suède ukina mu kibuga hagati yakinnye umukino wose ikipe ye yatsinzwemo Orgrypte IS ibitego 3-2.

Mu gihugu cy’u Bubiligi Standard Liège ukinamo umunyarwanda Hakima Sahabo umaze iminsi yaravunitse yatsinze FCV Dender ibitego 2-0.

Samuel Guelette ukinira La Louviere yo mu cyikiro cya kabiri mu Bubligi yatsinze na KMSK Deinze ibitego 2-1 mu mukino w’Umunsi wa kane wa shampiyona.

Muri uyu mukino Samuel Gueulette yakinnye iminota yose y’umukino.

Umuzamu Ntwali Fiacre yakinnye umukino wa mbere muri Kaizer Chiefs ubwo iyi kipe yatsindaga Marumo Gallants FC ibitego 2-1 mu mukino wa mbere wa shampiyona yo muri Afurika y’Epfo.

About The Author

Gate of Wise

Gate of Wise empowers you to stay ahead in digital innovation with insightful and accurate news on AI, blockchain, and digital currencies. We also offer smart advertising solutions to seamlessly connect your brand with a tech-savvy and engaged audience.

See author's posts

Nyamasheke: Agace gato ka Pariki ya Nyungwe kafashwe n’inkongi y’umuriro

Mon Sep 16 , 2024

Igice cya Pariki y’Igihugu ya Nyungwe kiri mu bilometero birenga 10 uvuye aho iyi pariki itangirira cyafashwe n’inkongi y’umuriro ku mugoroba wo ku wa Gatandatu tariki ya 14 Nzeri 2024. Igice cyafashwe n’inkongi giherereye mu Mudugudu wa Gacyamo, Akagari ka Save, Umurenge wa Ruharambuga, Akarere ka Nyamasheke winjiramo rwagati. Abaturage bahise […]