Anthropic, ikigo cyo muri Leta Zunze Ubumwe za Amerika gikora ikoranabuhanga ry’ubwenge buhangano, cyatanze ku wa mbere tariki ya 26 Ukwakira 2026 inyandiko isaba kwemererwa gutangira kugurisha imigabane yacyo ku isoko rusange, mu gikorwa kizwi nka Initial Public Offering (IPO).
Icyo kigo cyatangaje ko cyashyikirije Komisiyo ishinzwe kugenzura amasoko y’imari muri Amerika (SEC) inyandiko ya Form S-1, isabwa ibigo byifuza kwandikisha imigabane yabyo kugira ngo ishobore kugurishwa ku isoko rusange.
Anthropic irateganya ko imigabane yayo yo mu cyiciro cya A (Class A common stock) izacururizwa ku isoko rya Nasdaq Global Select Market, hakoreshejwe ikimenyetso ANT.
Icyakora, umubare w’imigabane izagurishwa n’igiciro izatangiriraho ntibiratangazwa. Inyandiko yashyikirijwe SEC ntiraba yemejwe burundu, bivuze ko imigabane itarashobora kugurishwa ku mugaragaro.
Iyi gahunda yo kujya ku isoko ry’imari ije mu gihe Anthropic ikomeje kwagura ibikorwa byayo, by’umwihariko mu gukora no guteza imbere porogaramu za AI zikoreshwa mu kazi, mu bushakashatsi no mu zindi serivisi.
Raporo y’imari yashyikirijwe SEC igaragaza ko amafaranga ikigo cyinjije mu mezi atandatu ya mbere ya 2026 yari miliyari 16.3 z’amadolari ya Amerika, avuye kuri miliyari 1.2 z’amadolari mu gihe nk’icyo mu 2025.
Nubwo amafaranga yinjira yazamutse cyane, Anthropic yatangaje igihombo cya miliyari 80.7 z’amadolari muri icyo gihe, ugereranyije na miliyari 13 z’amadolari mu mezi atandatu ya mbere ya 2025.
Icyakora, igice kinini cy’icyo gihombo cyaturutse ku mpinduka mu gaciro k’imigabane n’amasezerano y’ishoramari, aho kuba amafaranga yose yakoreshejwe mu bikorwa bisanzwe by’ikigo. Igihombo cyacyo mu mikorere ya buri munsi cyari hafi miliyoni 693 z’amadolari.
Ibi bigaragaza ko nubwo ubucuruzi bwa Anthropic buri kwaguka ku muvuduko ukomeye, gukomeza gukora no guteza imbere ikoranabuhanga rigezweho bisaba amafaranga menshi.
Anthropic yashinzwe mu 2021 n’itsinda ry’abashakashatsi bari barigeze gukorana n’ibindi bigo by’ikoranabuhanga. Ikigo kizwi cyane kubera gukora porogaramu ya Claude, ihangana n’izindi serivisi zirimo ChatGPT ya OpenAI.
Ibi bigo byombi biri mu isiganwa rikomeye ryo gukora ubwenge buhangano bushobora gukora imirimo igoye, gufasha ibigo n’abantu ku giti cyabo, no guhindura uburyo serivisi zitandukanye zitangwa.
Anthropic ifite kandi ubufatanye n’ibigo bikomeye by’ikoranabuhanga birimo Amazon na Google, byayishoyemo amafaranga kandi bikayifasha kubona ibikoresho n’ubushobozi bwo kubika no gutunganya amakuru akenewe mu gukora AI.
Umuyobozi Mukuru wa Anthropic, Dario Amodei, yagiye agaragaza impungenge ku ngaruka zishobora guterwa n’iterambere ryihuse ry’ubwenge buhangano, asaba ko habaho ubwitonzi mu gushyira hanze ikoranabuhanga rikomeye kurushaho.
Abasesenguzi n’abashoramari bakomeje gukurikirana agaciro Anthropic ishobora kugenerwa igihe izaba igiye ku isoko rusange.
Ikigo cyari gifite agaciro ka miliyari 965 z’amadolari mu ishoramari ryacyo ryabanje, ariko amakuru yatangajwe n’ibitangazamakuru agaragaza ko gishobora kugenerwa agaciro kari hagati ya tiriyari 1.5 na tiriyari 2 z’amadolari igihe kizaba kigurisha imigabane.
Hari n’amakuru avuga ko gishobora gukusanya agera kuri miliyari 100 z’amadolari, ariko Anthropic ntiratangaza umubare w’amafaranga yifuza kubona cyangwa igiciro cy’imigabane.
Niramuka ibaye ku rwego ruteganywa, IPO ya Anthropic ishobora guhangana n’iy’ikigo SpaceX, cyashyizeho agahigo ko gukusanya hafi miliyari 86 z’amadolari mu kugurisha imigabane ku isoko rusange muri Kamena 2026.
Gusa, abashoramari bazakenera kureba neza uko Anthropic izakomeza kongera amafaranga yinjiza, kugabanya ibiciro byayo no kugera ku nyungu, mu gihe ihangana mu isoko rya AI rikomeje gukaza umurego.
Icyemezo cyo gushyikiriza SEC inyandiko za IPO ntigisobanuye ko imigabane yatangiye kugurishwa.
Icyo gikorwa kizakomeza nyuma y’uko inzego zibishinzwe zisuzumye kandi zikemeza inyandiko, ndetse ikigo kikagaragaza umubare w’imigabane n’igiciro izatangiriraho.
