Indwara y'ibicurane iri kwiyongera cyane mu Burengerazuba bwa Leta Zunze Ubumwe za Amerika cyane muri Leta za Oregon na Utah, mbere y'igihe isanzwe itangirira.
Ubusanzwe, indwara y'ibicurane itangira kwiyongera mu Kuboza, ikagera ku rwego rwo hejuru muri Gashyantare buri mwaka. Ariko muri uyu mwaka, iki gihembwe cyatangiye hakiri kare, hagaragara umubare w'abanduye iyi ndwara urenze usanzwe.
Inzobere zitandukanye zivuga ko gutangira hakiri kare bishobora kuba bifitanye isano n'ihinduka ry'ubwoko bushya bwa virusi ya influenza A, buzwi nka H1N1.
Iyi virusi ikaba Ari na yo yari inyuma y'icyorezo cy'ibicurane by'ingurube cyabaye mu 2009.
Kugeza ubu, iyi virusi ya H1N1 igize virusi 242 muri 300 zitera ibicurane. Raporo zazo zatanzwe n'ibigo bya leta bishinzwe ubuzima rusange ku Kigo cyo muri Amerika gishinzwe kurwanya no gukumira indwara (CDC).
Muri Leta ya California, mu bihembwe bibiri by'ibicurane byashize, umubare w'ibipimo by'abapimwe bagasangwa bafite ibicurane wari hejuru gato ya 1% mu ntangiriro z'Ukwakira. Ariko kugeza ku wa 10 Ukwakira, uwo mubare wari ugeze kuri 9.65%, nk'uko imibare y'ishami ry'ubuzima rya leta ibigaragaza.
Kugeza ku wa 11 Ukwakira, Leta ya Utah yari imaze kugaragaramo abantu 242 banduye influenza A, ugereranyije n'abantu 10 gusa bari baragaragaye mu gihe nk'icyo umwaka ushize.
Iyi mibare yatangajwe na Germ Watch, urubuga rw'amakuru y'ubuzima rwa Intermountain Health.
Mu bice bimwe na bimwe byo hagati muri Leta ya Oregon na ho hagaragaye ubwiyongere bw'ubwandu bwa influenza A.
Ishyirahamwe ry'Abaganga bo muri Amerika rivuga ko inkingo z'ibicurane zishobora kugabanya uburwayi bukomeye n'umubare w'abantu bajyanwa mu bitaro. Risaba ko abantu bose bafite nibura amezi atandatu y'amavuko bakingirwa ibicurane.
Inkingo z'ibicurane zo mu mwaka wa 2026–2027, zemejwe n'Ikigo cya Amerika gishinzwe kugenzura ibiribwa n'imiti (FDA) muri Kanama, zigamije kurinda umuntu ubwoko bwa virusi za H1N1, H3N2 yari yiganje mu bihe by'ibicurane byashize n'ubundi bwoko bumwe bwa influenza B.
Scott Hensley, inzobere mu binyabuzima na mikorobe muri Kaminuza ya Pennsylvania, yavuze ko ibice bibiri muri bitatu bigize urukingo rw'uyu mwaka bisa n'ibihuye neza cyane n'ubwoko bushya bwa virusi ziri gukwirakwira.
Icyakora, yavuze ko ihinduka rya virusi ya H1N1 rishobora kugira ingaruka ku bushobozi bw'uturemangingo tw'umubiri turinda indwara ku bantu bakiri bato.
Kubera ko igihe cy'ibicurane cyatangiye hakiri kare, Hensley yavuze ko bishobora kuba byiza abantu bikingije hakiri kare.
Ni mu gihe Kandi Kwamamaza inkingo z'ibicurane byagabanyijwe kuva ku butegetsi bwa Robert F. Kennedy .
Mu rwego rwo kwirinda iri kwirakwira, Umunyamabanga w'Ubuzima muri Leta Zunze Ubumwe za Amerika, usanzwe azwiho kurwanya ibyorezo, yasavye Leta y'Amerika gutangira gutanga inkingo bahereye ku bana.
