"Cray Wanderers muri FA Cup yanditse amateka nyuma yo kugera mu cyiciro cya mbere cy'iri rushanwa ku nshuro ya mbere mu myaka 166 imaze ibayeho."nyuma yo gutsinda Bedford Town kuri penaliti 4-3.
Cray Wanderers yashinzwe mu 1860, ikaba ari yo kipe ya kera kurusha izindi zikibaho mu Mujyi wa Londres. Nubwo imaze imyaka 166 ibayeho, yari yaragerageje inshuro 77 kugera muri iki cyiciro ariko bikanga.
Mu mukino wo gushaka itike wabereye kuri Flamingo Park, amakipe yanganyije ibitego 2-2 nyuma y'iminota 120. Umunyezamu wa Cray Wanderers, JJ Briggs, yakuyemo penaliti ebyiri, afasha ikipe ye kubona intsinzi.
Jakob Lowe ni we watsinze penaliti ya nyuma, ahesha Cray Wanderers intsinzi ya penality 4-3 ihita ibona itike yo gukina icyiciro cya mbere cya FA Cup bwa mbere.
Kapiteni w'iyi kipe, Frankie Raymond, yabwiye BBC London ko ari intambwe ikomeye ku bakinnyi n'abakozi bayo, kuko bageze ku ntego ikipe yari imaze igihe kirekire itageraho.
Mu mateka yayo, Cray Wanderers yagize uruhare mu ishingwa rya Kent League mu 1894, ndetse hagati ya 1895 na 1907 ikorana na Woolwich Arsenal, ubu izwi nka Arsenal, mu guteza imbere abakinnyi bakiri bato.
Iyi kipe ikina mu cyiciro cya karindwi mu Bwongereza, aho iri ku mwanya wa 18 muri Isthmian League Premier Division.
Nyuma yo kubona iyi tike, Cray Wanderers izahura na Stockport County, ikipe iri ku mwanya wa kabiri muri League One. Uwo mukino uteganyijwe kubera kuri Flamingo Park, ukazanyuzwa kuri BBC Two.
Amatike y'uyu mukino yaguzwe yose mu minota itanu, hateganyijwe abafana 2,500, mu gihe ubusanzwe iyi stade yakira hagati ya 130 na 900.
