Inkunga ya Frw miliyoni 1.15 kuri buri rugo yahinduye imibereho y’abaturage, bamwe batangira kugura ubutaka n’amatungo

Umushinga wa GiveDirectly Rwanda umaze imyaka 10 utanga inkunga y’amafaranga ku miryango ifite amikoro make mu Rwanda, uravuga ko ingo zirenga 250.000 zo mu turere 23 zimaze kugerwaho n’iyi gahunda, aho buri rugo rwahawe inkunga ingana na Frw 1.150.000 yo kwikenura no kwiteza imbere.

Abaturage bahawe aya mafaranga bavuga ko yabafashije kwishyurira abana amashuri, kugura amatungo, gushora imari mu buhinzi no kubaka amazu, ibintu bavuga ko byahinduye imibereho yabo.

Ibi byagarutsweho ku wa Gatanu, tariki ya 16 Ukwakira 2026, ubwo GiveDirectly Rwanda yizihizaga imyaka 10 imaze ikorera mu Rwanda.

Uko inkunga yahinduye imibereho y’abaturage

Musengamana Alphonse wo mu Murenge wa Gikomero, mu Karere ka Gasabo, avuga ko mbere y’uko ahabwa inkunga ya GiveDirectly, we n’umugore we babagaho bakora imirimo y’abandi kugira ngo babone ibibatunga.

Avuga ko igihe yabwirwaga ko hari amafaranga bazahabwa yo kwikenura, atigeze yemera ko bishoboka kubona amafaranga yo guha abantu benshi.

Icyiciro cya mbere cy’inkunga ya Frw 350.000 cyamufashije kugura ingurube eshatu n’ihene ebyiri, ndetse yishyurira umwana we amafaranga y’ishuri.

Nyuma yaho, ubwo yahabwaga andi mafaranga angana na Frw 800.000, yumvikanye n’umugore we bagura inka n’indi hene, amafaranga asigaye na yo bayagenera umwana wabo kugira ngo akomeze kwiga.

Musengamana avuga ko ubu afite icyizere cy’ejo hazaza, kuko amatungo yorora ashobora kumufasha kubona ifumbire, amafaranga yo kugura ubutaka no kuzubaka inzu ye.

Yagize ati: “Mbwira umugore nti tuza ubu tubonye ubushobozi, tubonye ifumbire, amafaranga azava muri ariya matungo tuzagura imirima, nyuma nibwo tuzakora inzu yacu.”

Uko abandi baturage bakoresheje amafaranga bahawe

Undi muturage wo mu Karere ka Nyanza avuga ko inkunga yahawe yamufashije kwishyurira umwana we amafaranga y’ishuri, nyuma y’uko yari yabuze ubushobozi bwo gukomeza kumurihira.

Avuga ko amaze kubona ubutumwa bugufi bumumenyesha ko amafaranga yamugezeho, yahise afata Frw 160.006 ayaha umwana we kugira ngo ajye kuyishyura ku ishuri.

Ati: “Mbonye ubutumwa bugufi buje, nahise mfata amafaranga 160,006 nyaha umwana ayajyana ku ishuri.”

Amafaranga yasigaye yayaguzemo amatungo, akajya ayagurisha kugira ngo abone andi yo gukomeza kwiteza imbere.

Mu cyiciro cya kabiri cy’inkunga, yongeye guhuza amafaranga yari afite, yubaka ku kibanza cye kugira ngo abone aho aba, ndetse asigarana ingurube ebyiri yakuye muri ayo mafaranga.

Izi nkuru zigaragaza uburyo inkunga y’amafaranga ishobora gufasha umuryango kubona ibyo ukeneye by’ibanze, ariko ikanawubera igishoro cyo gukora ibikorwa byinjiza amafaranga.

GiveDirectly ivuga ko ikorana n’inzego za Leta

Gloria Ngabire, Umuyobozi wa GiveDirectly Rwanda, avuga ko amafaranga bahereza abaturage agamije kubafasha kwikura mu bukene no kugera ku mibereho myiza.

Yasobanuye ko uyu mushinga ukorana n’inzego za Leta mu kumenya abaturage bahabwa inkunga, hashingiwe kuri gahunda n’ibipimo bigaragaza imibereho y’ingo.

Avuga ko iyo basanze amafaranga atakoreshejwe neza, bafatanya n’inzego zibanze kugira ngo abaturage bahabwe ubujyanama n’amahugurwa bibafasha kuyakoresha mu bikorwa bibateza imbere.

Yagize ati: “Ntabwo tujya ahantu ari twe twijyanye, aho twagiye ni uko Leta yatubwiye ngo mwibande hano hantu, iyo tugiye kuhajya inzego z’ibanze zibanza gutegura abaturage zikabaganiriza ku buryo amafaranga azakoreshwa.”

Gloria Ngabire avuga ko GiveDirectly imaze gutanga asaga miliyoni 150 z’amadolari y’Amerika ku ngo zirenga 250.000 zo mu turere 23 tw’u Rwanda.

Abayobozi basaba abaturage gukoresha neza inkunga

Guverineri w’Intara y’Amajyepfo, Alice Kayitesi, yavuze ko iyi gahunda ifasha abaturage kuko ari bo bamenya ibyo bakeneye kurusha abandi, bityo bakaba ari na bo bahitamo uko amafaranga bahawe akoreshwa.

Yasobanuye ko kwishyurira abana amashuri, korora amatungo, kugura ubutaka no gukora ibikorwa byinjiza amafaranga bishobora gufasha urugo kuva mu bukene.

Guverineri w’Intara y’Amajyaruguru, Mugabowagahunde Maurice, na we yashimangiye uruhare rw’inzego z’ibanze mu gukurikirana abaturage bahawe inkunga, kugira ngo ibikorwa batangiye bikomeze gutanga umusaruro.

Minisitiri w’Ubutegetsi bw’Igihugu, Dominique Habimana, yasabye abaturage bamaze guhabwa amafaranga na GiveDirectly n’abazayahabwa mu gihe kiri imbere kuyakoresha neza, bakiteza imbere kandi bakarushaho kunoza imibereho y’imiryango yabo.

Yagize ati: “Ndagira ngo mbonereho gusaba ahabwa inkunga ya GiveDirectly ku bufatanye na Leta y’u Rwanda, yaba abamaze kuyibona n’abazayihabwa mu minsi iri imbere kuyikoresha neza bakiteza imbere.”

Buri dolari ritanzwe rivamo inyungu ya 2.5$

Ubushakashatsi bwavuzwe muri iyi gahunda bugaragaza ko kuri buri dolari imwe itanzwe mu baturage binyuze muri GiveDirectly, haboneka inyungu ingana n’amadolari 2.5,

bigaragaza uruhare rw’inkunga mu guteza imbere ingo n’aho ibikorwa byayo bikorerwa.

Umuyobozi wa GiveDirectly Rwanda, Gloria Ngabire, yavuze ko ubushakashatsi buheruka ku mibereho y’ingo mu Rwanda bwagaragaje ko Abanyarwanda miliyoni 1.5 bavuye mu bukene, agaragaza ko bishobora kuba bifitanye isano n’inkunga zagiye zihabwa abaturage.

Mu buryo amafaranga yatanzwe yakoreshejwe, 60% yagiye mu bikorwa by’ishoramari birimo kugura ubutaka n’amatungo no kongera umusaruro w’ubuhinzi. Andi 17% yakoreshejwe mu kuvugurura amazu, 12% arizigamwa, naho 11% akoreshwa mu kugura ibikenerwa mu buzima bwa buri munsi.

Mu kiganiro n’abanyamakuru, Gloria Ngabire yavuze ko GiveDirectly izakomeza ibikorwa byayo mu Rwanda igihe cyose izaba igifite ubushobozi bwo kubikora cyangwa ubukene butararanduka.

Yagize ati: “GiveDirectly ni umuryango w’ubwitange, tuzava mu Rwanda ari uko tubuze amafaranga, cyangwa ubukene burangiye.”

Ingo 200.000 ziteganyijwe guhabwa inkunga mu myaka itanu iri imbere

GiveDirectly Rwanda ivuga ko, ku bufatanye na Leta y’u Rwanda n’abandi bafatanyabikorwa, hateganyijwe ikindi cyiciro cy’imyaka itanu, aho nibura ingo 200.000 zizahabwa inkunga ingana n’iyatanzwe mu cyiciro cya mbere.

Iyi gahunda izakomeza gushyigikira ingo zifite amikoro make, hagamijwe kuzifasha kwihangira imishinga, kongera ubushobozi bwo kubona ibizitunga no kuzamura imibereho yazo.

Inkuru y’iyi gahunda igaragaza ko amafaranga ahabwa umuryango ashobora kuba intangiriro y’impinduka, cyane cyane iyo akoreshwa mu bikorwa birambye, nko kwiga, korora, guhinga no gushora imari.

Amafaranga make cyangwa menshi umuntu abonye ashobora kumubera intangiriro yo kwiteza imbere, iyo ayakoresheje neza, agategura ejo hazaza kandi agafata ibyemezo byubaka umuryango we.

Amakuru tuyakesha Umuseke.