Abantu bane bapfuye, abandi batanu barakomereka mu mpanuka y’ikamyo yagonze inyubako z’ubucuruzi mu Karere ka Rubavu, mu ijoro ryo ku wa Kane, tariki ya 15 Ukwakira 2026.

Iyi mpanuka yabereye mu Mudugudu wa Buhuru, Akagari ka Byahi, mu Murenge wa Rubavu, mu nkengero z’Umujyi wa Rubavu, ubwo ikamyo yari itwaye imizigo yagonaga inyubako z’ubucuruzi, igahitana abantu bari aho.

Abakomeretse bajyanywe kwa muganga

Umunyamabanga Nshingwabikorwa w’Umurenge wa Rubavu, Rwibasira Jean Bosco, yabwiye Intambwe Media ko iyi mpanuka yatewe no kutaringaniza umuvuduko w’ikamyo ifite pulake UBN 757D.

Yagize ati: “Impanuka yabaye mu masaha ya saa yine z’ijoro nibwo itewe no kutaringaniza umuvuduko.

Abantu bane bapfuye abandi batanu bayikomerekeyemo, umwe ajyanwa kuvurirwa mu Bitaro bya Kaminuza, CHUK naho abandi bane bari kuvurirwa mu Bitaro Bya Gisenyi.”

Muri iyi mpanuka, abantu batanu barakomerekejwe, umwe ajyanwa kuvurirwa mu Bitaro bya Kaminuza bya Kigali (CHUK), mu gihe abandi bane bajyanywe mu Bitaro bya Gisenyi kugira ngo bitabweho n’abaganga.

Ubuyobozi bwihanganishije imiryango y’ababuze ababo

Rwibasira Jean Bosco yihanganishije imiryango yabuze ababo n’abakomerekeye muri iyi mpanuka, avuga ko ubuyobozi buzakomeza kubaba hafi.

Yasabye kandi abatwara ibinyabiziga kujya bubahiriza amategeko y’umuhanda, bakagenzura umuvuduko n’imiterere y’ibinyabiziga batwaye, kugira ngo birinde gushyira mu kaga ubuzima bwabo n’ubw’abandi.

Iyi mpanuka yongeye kugaragaza akamaro ko kubahiriza amategeko y’umuhanda no kwitwararika mu gihe cyo gutwara ibinyabiziga, hagamijwe gukumira impanuka zishobora gutwara ubuzima bw’abantu.