Abayobozi ba Minisiteri y’Ikoranabuhanga na Inovasiyo (MINICT), ku bufatanye na Ambasade ya Danemark mu Rwanda, bahuriye mu kiganiro cyo kurebera hamwe ahazaza h’urwego rw’ikoranabuhanga mu Rwanda, hibandwa ku bikorwa remezo, ishoramari, imikoreshereze y’amakuru no kongerera Abanyarwanda ubumenyi muri uru rwego.


Iki kiganiro cyabaye kuri uyu wa Gatatu, tariki ya 18 Ugushyingo 2026, nk’uko byatangajwe na Rwanda Broadcasting Agency (RBA).


Muri icyo kiganiro, hagaragajwe ko u Rwanda rumaze gushyiraho bimwe mu byangombwa by’ingenzi bizarufasha guteza imbere urwego rw’ikoranabuhanga. Muri byo harimo ibikorwaremezo bifasha abaturage n’ibigo by’ubucuruzi kubona serivisi z’ikoranabuhanga hirya no hino mu gihugu, politiki zigenga ishoramari n’imikoreshereze y’amakuru, ndetse na gahunda zo kongerera Abanyarwanda ubumenyi mu ikoranabuhanga.


Iterambere ry’uru rwego riri mu byihutirwa u Rwanda rwiyemeje gukomeza gushyiramo imbaraga. Gahunda y’Igihugu y’Ishoramari n’Iterambere ry’Urwego rw’Ikoranabuhanga (ICT Sector Strategic Plan 2024–2029) igaragaza iby’ingenzi bizibandwaho, birimo guteza imbere ibikorwaremezo, umutekano w’ikoranabuhanga, ubumenyi, imikoreshereze y’amakuru, ikoranabuhanga rishya no guteza imbere udushya.


Mu rwego rwo kunoza imikoreshereze y’amakuru, u Rwanda rwanashyizeho Politiki y’Igihugu yo Guhererekanya Amakuru (National Data Sharing Policy), igamije gushyiraho uburyo bwo guhererekanya amakuru mu buryo bwizewe kandi bugenzuwe hagati y’inzego za Leta, kugira ngo serivisi zitangirwa abaturage zirusheho kunozwa.


Ibiganiro hagati y’u Rwanda na Danemark bigaragaza ubushake bwo kurebera hamwe amahirwe y’ubufatanye mu guteza imbere urwego rw’ikoranabuhanga, no gukomeza gushyigikira gahunda zigamije kwihutisha impinduka zishingiye ku ikoranabuhanga mu gihugu.