Umujyi wa Kigali ugiye kwakira ba rwiyemezamirimo 10 bageze ku cyiciro cya nyuma cy’irushanwa rya Africa’s Business Heroes (ABH) 2026, bazahurira mu gikorwa mpuzamahanga kizaba ku wa 1 n’uwa 2 Ukuboza 2026, bagamije guhatanira inkunga ya miliyoni 1.5 z’amadolari ya Amerika.


Iki gikorwa kizabera muri Kigali Convention Centre, kikazahuza ba rwiyemezamirimo, abashoramari, inzobere mu ikoranabuhanga n’abandi bafatanyabikorwa mu iterambere ry’ubucuruzi muri Afurika.


Nk’uko amakuru yashyizwe ku rubuga rwemewe rwa Africa’s Business Heroes abigaragaza, iri rushanwa ryitabiriwe n’abasaba barenga 24,000 baturutse mu bihugu 54 bya Afurika, ariko ba rwiyemezamirimo 10 ni bo babashije kugera ku cyiciro cya nyuma. Abo bakomoka mu bihugu umunani, barimo abagore bane, kandi impuzandengo y’imyaka yabo ni 35.


Miliyoni 1.5$ zizahatanirwa na ba rwiyemezamirimo 10


Muri iki cyiciro cya nyuma, buri umwe mu ba rwiyemezamirimo 10 azerekana umushinga we imbere y’akanama k’abacamanza, ahatanira inkunga igenewe gufasha imishinga yabo gukura no kwagura ibikorwa.


Uzegukana umwanya wa mbere azahabwa amadolari 300,000, uwa kabiri ahabwe 250,000, naho uwa gatatu ahabwe 150,000. Abandi barindwi bazahabwa amadolari 100,000 buri umwe. Hari kandi amadolari 100,000 agenewe amahugurwa yihariye yo gufasha ba rwiyemezamirimo kwagura ubumenyi n’ubushobozi bwabo.


Ibihembo ntibizashingira ku mafaranga gusa, kuko abageze muri iki cyiciro bazahabwa amahirwe yo kubona abajyanama mu bucuruzi, amahugurwa, kumenyekanisha imishinga yabo no kwinjira mu ihuriro ry’abafatanyabikorwa bashobora kubafasha mu rugendo rwo kuyagura.



Uretse irushanwa, iki gikorwa kizibanda ku ruhare rw’ubwenge buhangano (AI), ikoranabuhanga n’udushya mu guhindura imikorere y’ubucuruzi muri Afurika.


Ku munsi wa mbere, hazaba ibiganiro ku nsanganyamatsiko igaruka ku buryo Afurika ishobora kubaka ejo hazaza hayo hifashishijwe ubwenge buhangano n’udushya. Hazanagaragazwa ikoreshwa rya za robo, ibikorwa byo kugerageza ikoranabuhanga n’uburyo bushya bwo gukemura ibibazo byugarije ubucuruzi.


Ku munsi wa kabiri, ba rwiyemezamirimo 10 bageze ku cyiciro cya nyuma bazamurika imishinga yabo imbere y’abacamanza n’abazitabira, mu gikorwa kizaba ari cyo gusoza iri rushanwa.


Kwakira iki gikorwa i Kigali bizongera amahirwe yo guhuza abashoramari n’abafite imishinga itandukanye, ndetse no kumenyekanisha ibikorwa by’abanyafurika bari gukoresha ubucuruzi mu gushaka ibisubizo by’ibibazo bibangamiye imibereho y’abaturage.


Ku rubyiruko n’abandi bafite ibitekerezo byo kwihangira imirimo, iki gikorwa gishobora kuzaba amahirwe yo kunguka ubumenyi, kumenya uko imishinga yubakwa ikagera ku rwego mpuzamahanga no guhura n’abantu bashobora kubafasha kuyiteza imbere.